დახურული ბოსტნეულის ღვეზელი

ეს არის კლასიკური ინგლისური ღვეზელი , რომელიც იდეალურია გულიანი და თბილი სადილისთვის.

ფხვიერი, ოქროსფერი ცომის ქვეშ იმალება ნაღების, არომატული გულსართი: ნაზი ქათმის ხორცი, ხრაშუნა ბოსტნეულის ნარევი (ბროკოლი, სტაფილო, ბარდა) და სოკო, ყველაფერი ეს კი სქელ, მუსკატის კაკლითა და მდოგვით შეზავებულ სოუსშია ჩაფლული.

ეს კერძი შესანიშნავია ცივ დღეს ოჯახური სუფრისთვის. მიირთვით ცხელი, სანამ ცომი ჯერ კიდევ ხრაშუნაა!

ინგრედიენტები

• ხორბლის ფქვილი 200 გ + 3 ს.კ. (მაგიდის მოსაყრელად)
• კარაქი (გაცივებული) 125 გ
• ხახვი (წვრილად დაჭრილი) 1 ც.
• ქამა სოკო (ფირფიტებად დაჭრილი)100 გ
• ბოსტნეულის ნარევი (მწვანე ბარდა, სიმინდის მარცვლები, დაჭრილი ბროკოლი, სტაფილო და ა.შ.) 200 გ
• თბილი რძე 400 გ
• ქათმის ბულიონი 200 გ
• მუსკატის კაკალი 1 მწიკვი
• მდოგვის ფხვნილი 1 მწიკვი
• დაფნის ფოთოლი 1 ც.
• ქათმის ხორცი (მოხარშული და წვრილ ნაჭრებად დაჭრილი) 250 გ
• კვერცხი (ოდნავ ათქვეფილი) 1 ც. (ღვეზელის ზემოდან წასასმელად)

დამზადება

1. დიდ თასში გაცერით 175 გრ ფქვილი და მწიკვი მარილი. 85 გრ კარაქი დაჭერით პატარა ნაჭრებად და დაამატეთ ფქვილიან თასში. ხელით ზილეთ კარაქი და შეურიეთ ფქვილს, სანამ ფხვიერ მასას (ნამცეცებს) არ მიიღებთ (ეს სწრაფად უნდა გააკეთოთ, რათა კარაქი არ გადნეს და ცომი არ გათხელდეს; თუ ეს მოხდა, ცომი 10-15 წუთით შედგით მაცივარში, შემდეგ კი განაგრძეთ მუშაობა).
2. მას შემდეგ, რაც ფხვიერი მასა ერთგვაროვანი გახდება, დაამატეთ 2 სუფრის კოვზი ცივი წყალი და მოზილეთ ერთგვაროვანი ცომი (თუ ცომი არ მოიზილა, შეგიძლიათ დაამატოთ კიდევ 1-2 კოვზი წყალი). ცომი გადმოიღეთ ფქვილმოყრილ ზედაპირზე, მიეცით ბურთის ფორმა, შემდეგ შეახვიეთ საკვებ ფირში (ცელოფანში) და შედგით მაცივარში.
3. ღუმელი გააცხელეთ 180 გრადუსზე. ამასობაში მოამზადეთ გულსართი. სქელძირიან ქვაბში, საშუალო ცეცხლზე გააცხელეთ დარჩენილი 40 გრ კარაქი. ჩაყარეთ ხახვი და შუშეთ, პერიოდულად ურიეთ, დაახლოებით 5 წუთის განმავლობაში. შემდეგ დაამატეთ სოკო და შუშეთ, ურიეთ, სანამ არ დარბილდება, დაახლოებით 7-10 წუთი. დაამატეთ ბოსტნეულის ნარევი და კარგად აურიეთ.
4. ქვაბქვეშ ცეცხლი დადგით დაბალზე და დაამატეთ დარჩენილი 25 გრ ფქვილი. ურიეთ და ხარშეთ დაახლოებით 2 წუთი, სანამ მასა პასტის კონსისტენციას არ მიიღებს. მუდმივად ურიეთ და თანდათანობით ჩაასხით თბილი რძე. შემდეგ დაამატეთ ქათმის ბულიონი, მოაყარეთ მარილი, პილპილი, მუსკატის კაკალი და მდოგვის ფხვნილი, კარგად აურიეთ. ქვაბში ჩადეთ დაფნის ფოთოლი და ურიეთ, სანამ არ ადუღდება. როცა მასა შესქელდება, შეამცირეთ ცეცხლი, ამოიღეთ დაფნის ფოთოლი, დაამატეთ ქათმის ხორცი და მთელი მასა გადაიტანეთ ღრმა, ცეცხლგამძლე ფორმაში (დაახლოებით 23 სმ დიამეტრის).
5. ცომი გამოიღეთ მაცივრიდან და დადეთ ფქვილმოყრილ ზედაპირზე (თუ ცომი ძალიან გაყინულია, ოთახის ტემპერატურაზე დატოვეთ რამდენიმე წუთით).
6. ცომი გააბრტყელეთ და გადააფარეთ ფორმაში არსებულ შიგთავსს. თუ ცომი გადმოშვებულია ფორმის კიდეებიდან, ზედმეტი ფრთხილად მოაცილეთ, თუმცა მცირე ზომის ბორტები შეგიძლიათ დატოვოთ. ჩანგლით გაუკეთეთ ნაკვეთები ცომის მთელ ზედაპირზე, რათა ღვეზელი თანაბრად გამოცხვეს და არ გაიბეროს.
7. ღვეზელის ზედაპირი ათქვეფილი კვერცხით გადაუსვით და შედგით ღუმელში. აცხვეთ დაახლოებით 25 წუთი, სანამ ზედაპირი ოქროსფერს არ მიიღებს.
8. მიიტანეთ ღვეზელი სუფრასთან ცხელი.