ბოტვინია ძველებური რუსული რეცეპტით

ბოტვინია არის რუსული სამზარეულოს ძველი კერძი, რომელიც მზადდება სხვადასხვა სახის ბოტვის (ახალი ფოთლების) გამოყენებით, მჟავე კვასზე. თითოეული დიასახლისი ბოტვინიას თავისი რეცეპტით ამზადებდა. სადღესასწაულო ვარიანტისთვის უმატებდნენ თევზს და კიბორჩხალის ხორცს.

ეს ცივი სუპი მზადდება ბოტვას, ანუ ნებისმიერი საკვები ფოთლების საფუძველზე: ახალგაზრდა ჭარხლის, ისპანახის, მჟაუნას, ჭინჭრის. ბოტვინიას, ჩვეულებრივ, მიირთმევდნენ დამარილებულ ან მოხარშულ ზუთხისებრ თევზთან ერთად, ასევე წითელ თევზთან. მე სკუმბრია დავამატე. თევზის გარეშე ბოტვინია არასრულად ითვლებოდა. თუ როგორ მოვამზადოთ ბოტვინია ძველი რუსული რეცეპტით, სადღესასწაულო ვარიანტი, იხილეთ ქვემოთ რეცეპტში.

ინგრედიენტები

• სკუმბრია (ფილე) 400 გრამი
• ჭარხალი (მოხარშული) 2 ცალი
• კიბორჩხალა 8 ცალი
• დაფნის ფოთოლი 2-3 ცალი
• ხახვი 1 ცალი
• მწვანე ხახვი 2 ცალი
• კამა 1 კონა
• წიწაკა ბარდა (სურნელოვანი) 6 ცალი
• ბოტვა (ჭარხლის ფოთოლი, ისპანახი, მჟაუნა) 300 გრამი
• კიტრი 2 ცალი
• კვასი (გაცივებული) 600 მლ
• მარილი გემოვნებით
• დაფქული შავი პილპილი გემოვნებით

დამზადება

1. სკუმბრიას გამოაცალეთ შიგნეული, გარეცხეთ ცივი წყლის ქვეშ, მოაშორეთ ფარფლები, დაჭერით მსხვილ ნაჭრებად.
2. დაასხით წყალი, დაამატეთ დაფნის ფოთოლი, სურნელოვანი წიწაკა, მარილი, კამა. მიიყვანეთ ადუღებამდე, შეამცირეთ ცეცხლი, მოხადეთ ქაფი, ხარშეთ 15-20 წუთის განმავლობაში. თევზის ნაჭრები ამოიღეთ ბულიონიდან, მოაშორეთ ძვლები. ბულიონი გაწურეთ, მისი გამოყენება შეიძლება სხვა პირველი კერძების მოსამზადებლად.
3. მოამზადეთ კიბორჩხალები. წინასწარ დატოვეთ ისინი ცივ წყალში რამდენიმე საათით, რათა ტალახის ნარჩენები ჩამოირეცხოს. შემდეგ გარეცხეთ გამდინარე წყლის ქვეშ, გაწმინდეთ პატარა ჯაგრისით.
4. ქვაბში აადუღეთ წყალი კამით, სურნელოვანი წიწაკით, დაფნის ფოთლით და მარილით (1 სუფრის კოვზი 1 ლიტრ წყალზე). კიბორჩხალები ჩაუშვით მდუღარე ბულიონში, მიიყვანეთ ადუღებამდე, ამის შემდეგ ხარშეთ 10-15 წუთის განმავლობაში. გადმოდგით ქვაბი ცეცხლიდან და დააცადეთ კიბორჩხალები კიდევ 10 წუთი დაყოვნდეს. შემდეგ გადაიტანეთ ლანგარზე.
5. მოხარშული ჭარხალი გაფცქვენით, მწვანილი, ბოტვა და კიტრი გარეცხეთ.
6. ბოტვას, ისპანახს და მჟაუნას დაასხით წყალი, მიიყვანეთ ადუღებამდე, ხარშეთ ნელ ცეცხლზე 10 წუთის განმავლობაში. ნახარში გადაღვარეთ, ბოტვა კი ბლენდერით დააქუცმაცეთ.
7. ჭარხალი გახეხეთ სახეხზე, კამა დააქუცმაცეთ, ხახვი დაჭერით "ბუმბულებად", კიტრი კი — კუბიკებად.
8. თასში შეურიეთ ბოტვის პიურე, დაქუცმაცებული ბოსტნეული, მწვანილი, დაასხით მჟავე კვასი, დაამატეთ მარილი და პილპილი გემოვნებით.
9. გაცივებული კიბორჩხალები გაასუფთავეთ, ამოიღეთ ხორცი ბრჭყალებიდან. დაამატეთ თევზისა და კიბორჩხალის ნაჭრები ბოტვინიაში.
10. გემრიელად მიირთვით!